Juventude União Democratica Timorense (JUDT)
Ita hotu-hotu hatene ona katak, tinan lima ona ita nia rai Timor moris nudar nasaun independente hanesan mos nasaun seluk nebe iha mundo rai klaran. Liu husi buat sira ne’e hotu ami, nudar Juventude União Democrática de Timorense hakarak fo sai ba Povo Timor Leste tomak nomos lahaluha mos maluk Juventude iha Timor Leste tomak, katak ami nia apoio nebe mak agora dadaun fo sai liu husi media ne’e hanesan dalan ida atu hametin democrácia iha ita nia rai Timor Leste.
Tamba ami fiar katak candidatura nebe mak ami fo apoio ne’e hanesan imagen mai ita Povo Timor no liu-liu mai ita Juventude sira nebe mak nudar futuru ba Nasaun ida ne’e, katak Eng. João Viegas Carrascalão ninia contribuisão ba ita nia proseso ukun rasik aan nia durante 24-25 anos nia laran boot tebe-tebes.
Maske ba hela iha nasaun seluk hanesan Portugal depois muda fali mai iha Australia Sr. Eng. João Carrascalão lahaluha no halaó nafatin nia knar hanesan Timor oan hodi luta nafatin no koalia makas konaba prosesu ukun rasik aan nia, tamba Eng João Carrascalão hadomi tebe-tebes nia Povo no liu-liu ba ita Juventude nomos rai Timor Leste nebe mak ita hotu-hotu hadomi.
Maluk Juventude tomak iha rai Timor Leste mak ami hadomi, ita hot-hotu hatene ona katak, lakleur tan ita Juventude hamutuk ho Povo tomak iha rai Timor Leste hakat ba iha prosesu ida nebe mak importante teb-tebes mai ita, katak tinan 5 liu ba ita hakat ba primeiro prosesu hanesan eleisaun ba Assembleia Konstituante nebe mak Povo rai doben ida ne’e pasa liu tiha ona.
Nee mak fo hatudu mai Povo tomak nomos Juventude hotu katak ita iha ona representante Povo nia hodi halo lei inan nebe sai hanesan ita nia Dasar Hukum hodi nune ita hot-hotu bele hakruk no respeita hodi halao ita nia desenvolvimento ba rai doben ida ne’e.
Maluk sira hotu, ita hot-hotu hatene ita nia lei vigora tiha ona katak wainhira sidadaun ida atu ba tur iha Parlamento Nacional sai nudar povo nia representante tenke tuir prosesu legal ida hanesan eleisaun geral ba Parlamento katak Povo mak deside, Povo mak hili. Maibe tuir mai ita nia representante iha Assembleia Konstituante muda aan nudar representante Povo nia hodi koalia konaba Povo nia susar maibe to’o ohin loron buat nebe mak ita hot-hotu hakar lamosu, Povo ho Juventude mak terus nafatin. Maluk Juventude sira ami espera katak buat sira hanesan ne’e ita hot-hotu lakohi atu mosu tan iha ita nia rai, katak atitude nebe mak ita pasa liu ona ne’e tenke soe ona tamba buat sira nee mak sai hanesan obstaculo boot ba Povo rai doben ida ne’e.
Neduni hare ba buat sira ne’e hotu lao lalos halo ita sofre nafatin, nemak ami JUDT hamrik hodi fo apoio total ba Eng. João Viegas Carrascalão sae ba Presidente da Republica Timor Leste.
Ami espera katak Eng. João mak nudar solusaun atu rezolve problema nebemak Povo enfrenta to’o ohin loron. Buat sira ne’e mak hanesan, Povo oras ne’e hamlaha, terus nafatin, laiha servico, falta nutrisaun ba labarik sira, Juventude sira barak mak laiha servico, barak mak escola lahotu tamba osan laiha, tamba inan aman sira laservico, falta kampu de servico, buat sira ne’e hotu sai problema boot mai ita Povo kiik oan ne’e.
Tuir mai, ami hakarak koalia oituan konaba tamba saida mak ami fo apoio total ba Eng. João Viegas Carrascalão nebe mak sai nudar candidatura independente ba Presidente da Republica Timor Leste tinan 2007-20012.
Ita hot-hotu hatene no kuinhece semak Eng. João? Wainhira Povo rai ida ne’e infrenta hela situasaun nebe mak dificil susar atu hanoin konaba prosesu ukun rasik aan nian, ema balun hanoin katak rai Timor Leste ne’e sai ona hanesan Indonesia nian, maibe ita haluha katak iha rai liur neba ita nia oan, ita nia maun, sira hanesan Eng. João Carrascalão hamutuk ho maluk sira seluk luta nafatin ba rai Timor hodi nune bele hetan ukun rasik aan.
Maluk sira contribuissaun Eng. João Carrascalão nian konaba luta auto determinasaun Povo rai ida ne’e nia boot tebes, ita hare no lembra fila fali ba kotuk konaba Conselho Nacional Resistencia Timorense (CNRT), husi ne’e Sr. Eng. João ema ida que conservativo duni tamba iha prinsipios nacionalismo nebe makas defende Unidade Nacional to’o ohin loron.
Hodi ida nemak Povo fo fiar ba Eng. João Carrascalão ho nia maluk sira hodi hari no hametin organisasaun CNRT nebe mak ita hot-hotu hatene ikus mai ho buat sira ne’e Timor Leste sai nudar nasaun foun ida iha Asia Pacific.
Tuir mai ita mos hare fail ba kotuk konaba oinsa organisasaun Nações Unidas (UN) hodi tama mai atu prepara Timor oan hotu hodi halao Consulta Popular atu determina Povo nia sofrimento durante 24 anos nia laran, buat sira ne’e uluk nanain liu husi prosesu ida hanesan acordu entre Indonesia ho Portugal inclui mos Timor oan atu ba hamrik iha oin hodi fo apoio ba acordu ne’e, Timor oan nemak Eng. João Viegas Carrascalão, acordu nemak ita hot-hotu kuinhece ho naran Acordu 5 de Maio 1999 (Perjanjian 5 Mei 1999).
Maluk sira Juventude ho Povo tomak mak ami hadomi, ikus mai ami hakarak hato deit ba maluk sira hotu katak, ami sei la obriga ema ida atu vota ba Eng João Carrascalão maibe se ita hot-hotu hakarak futuru ita Juventude atu diak então hanoin didiak ba hodi hili tuir imi nia hakarak, tamba buat barak mak ita hare ona katak iha falatas barak los iha ita nia rai Timor Leste.
Ami espera katak Eng. João Carrascalão mak sei resolve buat sira ne’e hotu wainhira Povo fo fiar ba nia atu sai nudar Presidente da Republica Timor Leste 2007-20012.
Hakuak ba imi hotu
VIVA Eng. João Viegas Carrascalão!
Husi Sekretariado JUDT,
João Maria Lima
Sem comentários:
Enviar um comentário